అద్దెకొక అమ్మకడుపు

గుజరాత్ రాష్ట్రానికి చెందిన ఆణంద్ పట్టణం చాలా కాలం నుంచి పాల ఉత్పత్తికి ప్రసిద్ధి గాంచింది. అది ఇప్పుడు మఱొక విషయంలో దేశానికి ఆదిగురువయింది. అదేమిటంటే-ఒక ధరకు నిస్సంతు దంపతులకు పిల్లల్ని కనివ్వడం. ప్రస్తుతం ఆణంద్ ఒక్కటే కాదు. చాలా గుజరాతీ పట్టణాల్లో అద్దెకడుపుల (surrogacy) వ్యాపారం మూడుపువ్వులూ ఆఱుకాయలుగా వర్ధిల్లుతోందని ప్రసారసాధనాలు ఘోషిస్తున్నాయి. ఇలా కడుపులు అద్దెకు కావాలని కోరే దంపతుల్లో ఎక్కువమంది ప్రవాసభారతీయులు. కొంతమంది అచ్చమైన విదేశీయులు కూడా ఉన్నారు. స్థానిక లేడీ డాక్టర్ల దగ్గర అర్హులైన అద్దె-అమ్మల జాబితా ఉంటుంది. సాధారణంగా కనీసం ఒక్క స్వంత బిడ్డనైనా కని ఉన్న స్త్రీలని అద్దెకు తీసుకోవడానికి లేడీ డాక్టర్లు ఇష్టపడతారు. బిడ్డని కనిచ్చినందుకు నిస్సంతు దంపతులు ఐదాఱు లక్షల రూపాయల వరకు చెల్లిస్తున్నారు. అందులో సగం లేడీ డాక్టరుకీ, సగం అద్దె-అమ్మ (surrogate mother) కీ వెళుతుంది. అమెరికాలో చేయించుకునే ఫలదీకరణ (fertilization) ప్రయోగాల కంటే ఇది చాలా తక్కువ ఖర్చు కావడంతో వారు వెనుదియ్యడంలేదు.

ఇది తప్పా ? ఒప్పా ? అనే ప్రశ్నకు అక్కడ తావులేదు. పుట్టే బిడ్డ తమకు చెందదని తమకు బాగా తెలుసనీ, అందుచేత సెంటిమెంట్లేమీ ఫీలవ్వడంలేదని అద్దె-అమ్మలు చెబుతున్నారు. నిజానికి సెంటిమెంటు ఫీలవుతున్నది బిడ్డని తీసుకెళుతున్న నిస్సంతులే. "ఆమె మాకు చేసిన మహోపకారంతో పోలిస్తే మేము ఆమెకిచ్చిన మూడు లక్షలు ఒక లెక్కలోవి కా"దంటున్నారు వారు.

అక్కడ డాక్టర్ నయనా పటేల్ అనే ఒక వైద్యురాలి సంరక్షణలో ఎప్పుడూ ఒక 40 మంది అద్దె-అమ్మలు ఉంటారు. "ఉభయులకూ ఇది తరుణోపాయమైనప్పుడు తప్పేముంది ?" అంటారు డా॥ నయనా పటేల్. ఆమె మార్గదర్శనంలో ఇలాంటివి విజయవంతం కావడంతో చాలామంది అద్దె-అమ్మలుగా మారడం కోసం ముందుకొస్తున్నారు. ఒకే కుటుంబంలో తల్లీ, కూతురూ, కోడలూ ఒకేసారి అద్దెగర్భాలతో ఉండడం కూడా అక్కడ మామూలైపోయింది. అయితే ఇలాంటి గర్భాలు ఇండియాలో చట్టబద్ధమే గనుక అడ్డంకులేమీ లేవు.

కాని ఇది ప్రకృతిసహజమైన, సమాజ సమ్మతమైన (వివాహిత) గర్భధారణకు ప్రత్యామ్నాయంగా పరిణమిస్తే ఎదురుకాగల పరిణామాల గుఱించి సమాజశాస్త్రవేత్తలు భీతిల్లుతున్నారు. పెళ్ళయినా, కాకపోయినా తల్లి అవాలో లేదో నిర్ణయించుకునే హక్కు ఆడదానికి ఉండాలని వాదించే ఫెమినిస్టులు ఇంకా ఆ సిద్ధాంతాన్ని శాసనరూపంలోకి తేలేకపోయారు. ఒకవేళ తెస్తే అద్దె-అమ్మలు మరీ ఎక్కువైపోతారని ఒక అంచనా. ఇప్పుడు నిస్సంతుల కోసమే ఉపయోగపడుతున్న అద్దె గర్భాలకు, భవిష్యత్తులో ఇతర జనసామాన్యంలో కూడా మరింత గిరాకీ ఏర్పడుతుందని అద్దెకడుపుల వ్యాపారస్తుల ఆశాభావం. ఇది పూర్తిగా అసంభవం కాదు. ప్రస్తుతం మన దేశంలో విడాకుల శాతం 24 కు చేరుకుంది. బహుశా ఇప్పటి హోమ్‌ లోన్సులానే అప్పుడు గర్భాల్ని అద్దెకు తీసుకోవడానికీ surrogacy loans ఇచ్చే బ్యాంకులు తయారవుతాయి. పెళ్ళితో ఆడవాళ్ళ హక్కులూ వగైరా తలనొప్పులుంటాయి కనుక అవేవీ లేకుండానే ఒక వారసుణ్ణి సృష్టించుకోవడానికి ఘోటక బ్రహ్మచారులు మొగ్గుచూపవచ్చు.

ఇంకా ఎన్నో జరగవచ్చు. ఇప్పుడే అవన్నీ ఊహించడం కష్టం.